Verksummerki fjallar um það huglæga, persónulega og nærgöngula í ljósmyndun okkar daga. Á sýningunni eru tvinnuð saman verk sex ljósmyndara sem gera hversdaginn og eigið líf að meginviðfangsefni sínu. Ljósmyndirnar á sýningunni eru eftir Agnieszku Sosnowska, Báru Kristinsdóttur, Daniel Reuter, Hallgerði Hallgrímsdóttur, Kristinu Petrošiutė og Skútu. Sýningarstjóri er Brynja Sveinsdóttir.
Kjarni sýningarinnar er ljósmyndarinn sjálfur sem myndasmiður og sjálft viðfangsefni myndanna. Ljósmyndararnir eiga það sammerkt að fjalla um eigið líf með tilvísunum í reynslu, minningar og tilfinningar eða sem skrásetjarar síns nánasta umhverfis og daglegs lífs. Verkin á sýningunni eru vitnisburður um hversdaginn og verksummerki um líf ljósmyndaranna.
Sýningin opnaði í Ljósmyndasafni Reykjavíkur 16. maí og er hluti af dagskrá Listahátíðar í Reykjavík 2015. Hún stendur til 13. september en nánari upplýsingar er hægt að nálgast hér: http://www.ljosmyndasafnreykjavikur.is/verksummerki-huglaeg-og-personuleg-samtimaljosmyndun/